Í sendingini 3-2 í kvøld var lutakast um, hvør skal leika í móti hvørjum um Løgmanssteypi.

Fyrsti dysturin hjá okkum verður á útivølli í móti vinnarinum av FF Giza - Undri.

Vit skullu leika leygardagin 27.03.

Næsti dagur í Eysturoyar Kappingini var í dag, og skráin sá eisini sera spennandi út. Fyrst skuldu NSÍ - B68 spæla um 3. og 4. pláss, og har gekk tað hart fyri seg frá fyrsta bríksli. Dagfinn Olsen dømdi dystin og mátti í eldin beinanvegin, tí nýggi B68 áleyparin, Camara, bleiv feldur í NSÍ brotsteiginum, og har var einki annað hjá Dagfinni at gera enn at døma brotsspark. Camara tók sjálvur brotssparkið og skeyt bóltin trygt í netið til 1-0 til B68. Nakrar minuttir seinni, var Dagfinn aftur noyddur til at taka eina stóra avgerð, tí Jens Joensen hjá NSÍ gjørdi eina heldur ógvuslioga takkling, og tí mátti hann taka reyða kortið úr lummanum og vísa Jens av vøllinum. Løtu seinni legði ungi toftamaðurin, Oddur Højgaard, B68 á odda 2-0 og nakað áðrenn hálvleik økti Camara um leiðsluna til 3-0 til B68. B68 hevði leikligu yvirvágina í fyrra hálvleiki, men NSÍ settu seg eitt sindur meir á dystin í seinna hálvleiki, og Jonhard Fredriksberg minkaði eisini um munin til 3-1, sum eisini gjørdist endaliga úrslitið av dystinum um 3. og 4. plássið. Í stuttum var dysturin ikki serliga poleraður, men bæði liðini bardust fyri sakini og bakkaðu bestemt ikki fyri hvørjum øðrum. Venjararnir fingu eisini roynt teir flestu leikararnar, og tá er tað sera torført at fáa tað flótandi spælið at koyra.

Finalan bleiv spæld beint eftir dystin um 3. og 4. plássið, og har var talan um enn eina lokaluppgerð, nevnliga ímillum ÍF - Víking. Ikki var so øgiliga nógv at skriva heim um í fyrra hálvleiki, tí spælið var minni gott hjá báðum liðum, og ikki vóru nógvir málmøguleikar. Bárður Mortensen dømdi finaluna, og nakrar minuttir áðrenn hálvleik sendi hann Niclas Niclasen og Rógva Jacobsen útum at køla seg niður eina løtu, tí teir høvdu smábeistast eitt sindur meðan teir bíðaðu eftir einum hornasparki - teir komu tó báðir innaftur til byrjanina av 2. hálvleiki. Fyrri hálvleikur endaði 0-0. ÍF kom betri frá byrjanini av 2. hálvleiki, og løgdu seg á odda eftir hornaskark, har Høgni Zachariassen var hægstur og skallaði bóltin handan Geza Turi í Víkinga málinum. Nakrar minuttir seinni bleiv ein Víkingaleikari feldur í ÍF brotsteiginum, og so floytaði Bárður fyri brotssparki til Víking. Finnur Justinussen var settur at taka. Finnur traðkaði fram til bóltin og skeyt til sína vinstru síðu, men har hevði Jákup Mikkelsen longu blaka seg og skumpaði bóltin framvið baklinjuni - ein sera góð bjarging frá Jákupi. Víkingur kundi havt javna, men í staðin legði ÍF seg á odda 2-0, eftir sera gott spæl frá ÍF'arunum. Ein høg sending var løgd á høvdið hjá Rógva, sum sendi Andy leysan í vinstru síðu; Andy tamdi bóltin væl, tók eini tvey trekk og skrúvaði bóltin upp í handara horn. 2-0 gjørdist eisini endaliga støðan, og tískil vann ÍF Eysturoyar Kappingina 2010. Í stuttum var fyrri hálvleikur sera ópoleraður og illa spældur, við nógvum fríspørkum og steðgum í spælinum, meðan 2. hálvleikur var rímuliga væl spældur frá báðum síðum. ÍF'ararnir vóru farligari á degnum, og tí var tað ikki ófortjent at teir vunnu í dag. Atli Larsen handaði steypið vegna P/F Petur Larsen (gevari av steypinum), og Høgni Zachariassen tók ímóti steypinum sum liðskipari hjá ÍF. Talan er um eitt ferðasteyp, so Eysturoyar Kappingin skal vinnast trý ár í trekk, ella vinnast 5 ár av sama liðið, áðrenn tað verður vunnið til ognar.

ÍF liðið sá soleiðis út í fyrra hálvleiki: Jákup - Uni, Poul, Høgni, Rúni - Fritleif, Alex, Karl, Andy - Dánjal, Rógvi. ÍF liðið í seinna hálvleiki: Jákup, Áki, Poul, Kaj, Høgni - Nenad, Fritleif (Ari), Karl (Sverri), Andy (Atli) - Øssur, Rógvi. Óla Jákup kom ikki inn í dystinum, og fleiri aðrir manglaðu í dag: Jákup, Jan og Eyðun vóru skaddir, meðan Frank er staddur uttanlands.

ÍF takkar Víkingi, NSÍ og B68 fyri luttøkuna í ár, og vónar at liðini eru áhugaði í at luttaka í Eysturoyar Kappingini aftur komandi ár. Eisini takkar ÍF dómarunum fyri luttøkuna: Dagfinn Olsen, Jan á Líðarenda, Johnleif Gerðisá, Alex Troleis, Bárður Mortensen, Kristian Sofus Petersen og Hagbard Joensen.

Alt í alt, ein sera væl eydna kapping, ið verður leikt á hvørjum árið framyvir.

ÍF liðnum verður ynskt hjartaliga tillukku við steypinum.