Mánakvøldið, 29. apríl, verður temakvøld í Fuglafirði, um at skipa fyri barnavenjingum í U6-U9 aldri. Tað er Christina Ravnsfjall, Grassroots samskipari, sum stendur fyri temadegnum.
Skráin er hendan:
17.00: Upplegg um at skipa fyri barnavenjing
17:45: Venjing við U7 hjá ÍF
18:45: Eftirmeting og samanumtøka
Liðugt í seinasta lagi kl. 20.00.
Øll áhugaði foreldur eru hjartaliga vælkomin.
Sáttmálar eru skrivaðir við Hans Jørgen Djurhuus og Kára Reynheim.
ÍF kann í dag kunngera, at nýggir venjarar eru knýttir at betriliðnum hjá monnum. Talan er um tveir navnaframar harrar, sum í nógv ár hava markerað seg í føroyska fótbóltslandslagnum.
Hans Jørgen hevur seinastu árini verið knýttur at venjaratoyminum hjá Víkingi, meðan Kári seinast sat við róðrið hjá AB, tá liðið flutti upp í bestu deildina í 2017. Teir traðka til beinavegin, og verða javnsettir í venjaratoyminum.
Vit í ÍF eru sera spent uppá hesa samansetingina, og ynskja nýggju venjarunum vælkomnum til felagið og alt tað besta!
Koyr á ÍF!
Tíðliga sunnumorgunin setti føroyska U17-landsliðið við dreingjum kós ímóti Riga í Estlandi, har UEFA menningarkapping er á skránni næstu dagarnar. Umframt Føroyar og vertslandið, eru Litava og Liktinstein eisini við í kappingini.
– Fleiri landsliðsvenjingar hava verið á skránni seinastu tíðina, og tær hava verið góðar. Tá talan er um menningarkapping, er menningin sjálvandi tað týdningarmiklasta, men vit fara sjálvandi altíð eftir at vinna, og eiga vit at kunna vera væl við í hesum dystunum, sigur Áki Johansen, landsliðsvenjari, við fsf.fo.
Vegna skaða varð ein broyting gjørd í føroyska hópinum dagin fyri fráferð. Hans Jákup Arngrímsson úr Víking hevur givið avboð, og í staðin hevur landsliðsvenjarin sent boð eftir Dávidi Petersen úr ÍF.
Fyrsti dystur í kappingini verður mánadagin 22. apríl kl. 11:00, tá Føroyar og Litava møtast á Sportland Arena. Mikudagin 24. apríl kl. 15:00 spæla Estland og Føroyar, meðan seinasti dystur er fríggjadagin 26. apríl kl. 09:00, tá Liktinstein er mótstøðuliðið.
Nevndu tíðir er føroysk tíð. Dystirnir verða tíverri ikki stroymdir, men heimasíðan dystir.fo fer at fylgja gongdini beinleiðis.
Hópurin
Olaf Bárðason, Víkingur
Bergur J. Poulsen, Víkingur
Dávid Petersen, ÍF
Dávid Matras, KÍ
Jens Mortan Samson, KÍ
Mortan Rasmussen, KÍ
Emil Weihe Joensen, B36
Mattias Weihe Joensen, B36
Martin Agnarsson, B36
Eyðbjørn Østergaard, B36
Heini Sørensen, FC Midtjylland (DAN)
Áki Samuelsen, FC Midtjylland (DAN)
Samuel Johansen Chukwudi, HB
Elias Rusborg, Hvidovre (DAN)
Suni Hansen, NSÍ
Jørgin Nielsen, NSÍ
Bogi Hentze, B71
Poul Kallsberg, Skála
Høvuðsvenjari er Áki Johansen, og hjálparvenjari er Jens Kristian Hansen.
Í summar skal føroyska U17-liðið til árligu NM-kappingina, sum í ár verður í Danmark, og síðani er EM-undankappingin á skránni í heyst. Tá skulu okkara dreingir møta Danmark, Svøríki og Litava.
Vit ynskju dreingunum góða túr.
Til lukku Dávid og góða eydnu
Ásannandi at tilgongdin til tær yngstu deildirnar kundi verið størri, so hevur ÍF avgjørt at bøta um undirtøkuna. Í tí sambandi varð skipað fyri foreldrafundi 4. apríl serliga ætlaður árgangum 2012 og 2013 (bæði gentum og dreingjum). Fleiri foreldur nýttu møguleikan, hóast fimleikaframsýning var somu tíð.
Vikuna eftir kom so Christina Ravnsfjall, grassrootsmennari hjá FSF, til Fuglafjarðar, har hon vísti eina aldurssvarandi venjing í Fløtugerði. 18 leikarar og foreldur teirra møttu, hóast svimjifelagið eisini hevði tiltak.
Ein facebook-bólkur er stovnaður: ÍF U7 2019 D/G árg. 12/13 + yngri
Mánadagin 29. apríl verður Christina aftur í Fuglafirði og tá skipar hon fyri venjing fyri U6-U9
ÍF – komið øll við! 😊
Vit skulu við hesum boðað frá, at samstarvið við Hegga Samuelsen, venjara hjá Betri liðnum hjá monnum, er endað.
Vit skulu nýta høvið at takka Hegga fyri hansara íkast til afturvendanina til fremstu deildina. Vit skulu somuleiðis ynskja honum blíðan byr og bestu eydnu framyvir.
ÍF hevur ikki fleiri viðmerkingar til málið, uttan at tað verður arbeitt við at finna nýggjan venjara.
Í døgunum 5. til 12. mai fer føroyska U17-landsliðið við gentum til Hvítarussland, har UEFA menningarkapping verður á skránni.
Umframt at spæla ímóti Hvítarusslandi, skulu føroysku genturnar eisini royna seg móti Aserbadjan og Kasakstan.
Øssur Hansen er venjari hjá U17-landsliðnum við gentum, og hann hevur nú sett navn á tær 18, ið eru úttiknar til kappingina.
Í hópin ið er úttikin er Jenny R. Petersen, til lukku við úttøkuni og góða eydnu.
Fuglfirðingar vistu, at í dag fóru teir at stríðast móti einum sera sterkum og stríðshugaðum KÍ-liði, og tí máttu ÍF- spælararnir spíla seg út, so teir fingu eitt sámuligt úrslit.
ÍF-liðið hevur havt tann stóra veikleika, at tað spælir væl helvtina av dystinum, meðan hin helvtin aloftast er vánalig.
Júst hetta hendi aftur í dag.
KÍ byrjaði nógv betur
KÍ- liðið byrjaði sum eitt óløgi, spældu hart og spælið var væl skipað, og teir vístu frá fyrsta bríksli, at hetta var eitt lið, ið varð trupult at stega í síni sigursgongd – og helst var hetta ein partur í taktiska spælinum.
Tað gingu ikki meira enn 4 minuttir, so fekk KÍ sítt fyrsta mál, ið var fult uppiborið.
Nakað seinni fingu teir næsta málið, ið ein fuglfirðingur var so óheppin at seta í egið mál.
Og nakað áðrenn hálvleik fekk KÍ sítt triðja mál, so fyrri hélvleikur endaði við einum 3-0 sigri til KÍ.
Mangir ÍF – fjepparar stúrdu fyri einum rættiligum skrædli, tí heimaliðið vísti snøgt sagt einki í fyrra hálvleiki.
So hendi tað aftur.
So skjótt seinni hálvleikur varð bríkslaður í gongd, sóu áskoðararnir eitt heilt annað ÍF – lið, ið spældi kvikan og skilagóðan fótbólt, ið KÍ -liðið hevði ilt við at steðga.
Og so brádliga eydnaðist tað Dánjal á Lakjuni at seta bóltin í málið til 3-1.
Fuglfirðingar fingu nú yvirvág í spæli, og nakað seinni eydnaðist tað Dánjal Paula Højgaard at seta bóltin í málið, so støðan gjørdist 3-2.
ÍF pressaði á fyri at fáa javnleik og fleiri ferðir var nær við, men tað var bara ov lítið.
Dysturin endaði við 3-2 til KÍ, og vit kunnu staðfesta, at KÍ átti fyrra hálvleik, og ÍF átti seinna hálvleik.
Uppgávan hjá Hegga og Ólavi er at finna greiðu á, hvat kann gerast, so at ÍF-liðið spælir væl allar teir 90 minuttirnar og ikki bert teir 45.
Góða eydnu. Vit stuðla okkara liði, bæði tá tað gongst væl, og tá tað gongst minni væl.
Skriva hevur Signar á Brúnni
Vit hugsa okkum eitt nú at bjóða eldrarøktini fitnesshølini, sum verða í nýggja ítróttarhúsinum, til venjingar fyrrapart á degnum, sigur borgarstjórin
Nú skal nýtt ítróttarhús byggjast í Fuglafirði. Sáttmáli er undirskrivaður millum Fuglafjarðar kommunu og byggifyritøkuna, Heildarverk.
Tíðarætlanin fyri avtalaða partin av byggingini er sett til hin 1. apríl í 2020. Tað merkir, at niðasta hæddin í húsinum, sum annars verður í trimum hæddum, verður klár at taka í nýtslu og kemur at lúka øll krøv í samband við heimadystir hjá ÍF frá kappingarárinum 2020 at rokna.
Tvey byggistig
Samlaða byggiverkætlanin er í tveimum stigum, harav 1. byggistig fevnir um inniloking av øllum húsinum, eins og niðasta hæddin verður gjørd klár at taka í nýtslu um eitt ár.
Undirskrivaði arbeiðstakarasáttmálin er á stívliga 13,9 miljónir krónur, umframt partin hjá kommununi av meirvirðisgjaldinum á 6,25 prosent. Hetta svarar til stívliga 871,2 krónur – ella stívliga 14,8 miljónir krónur tilsamans.
Sokkulin stoyptur
Sonni á Horni, borgarstjóri í Fuglafjarðar kommunu, sigur, at sokkulin er stoyptur, og hann væntar, at um ikki so langa tíð fer tað rættiliga at síggjast, at byggingin av nýggja ítróttarhúsinum er í gongd.
Tá gamla húsið varð rivið niður í 2017, varð alt jørðarbeiðið til nýggja húsið gjørt.
Tey eldru til fitness
Sonni á Horni vísir á, at í miðhæddini í ítróttarhúsunum verður fitnessrúm, sum ætlanin er eisini skal kunna brúkast av almenninginum í kommununi.
Stóran týdning
Sonni á Horni sigur, at tá tann tíðin kemur, at fitnesshølini standa liðug, verður neyðugt at samskipa, hvussu hølini skulu brúkast, og nær hvør skal brúka tey.
Dysturin millum TB og ÍF í dag gjørdist sera spennandi.
TB-liðið byrjaði nógv betur, spælarar teirra stríddust sum fyri lívinum, meðan fuglfirðingar einki løgdu í lívið og spældu sum best bar til.
Tó hevði ÍF-liðið rættiliga tíðliga fleiri málmøguleikar, tá ið spælarar stóðu frammanfyri einum einamøllum málmanni, men so eiðasørt, skotini fóru væl við síðuna av málinum.
TB fær fyrsta málið
TB-liðið fekk fyrsta málið í fyrra hálvleiki eftir ÍF- verjuvillu . Hálvleiksstøðan bleiv 1-0 til TB-liðið, ið var nógv tað grammara liðið, og høvdu suðuroyingar uppiborið sigurin.
ÍF-liðið ikki at kenna aftur.
Seinni hálvleikur bleiv nakað heilt annað, ÍF-spælararnir vóru ikki at kenna aftur, helst hava teir fingið av at vita frá venjarum sínum.
Allir sum ein stríddust væl, og ÍF-liðið átti seinna hálvleik við “rubb og stubb.”
ÍF skorar.
Nakað út í seinna hálvleik eydnaðist tað Jan Ellingsgaard at fáa fyrsta málið fyri ÍF og so varð javnleikur.
ÌF liðið gjørdi nakrar útskiftingar.
Vandamikli og royndi Dánjal á Lakjuni kom inn saman við Jóhan Petersen, báðir álopsspælarar, og tað gjørdi sanniliga mun.
Jóhan hevði ein branddyst.
Jóhan Petersen hevði ein stak góðan dag, var kvikur og spældi skilagott.
Hann megnaði at reka fram í høgru síðu og skjóta bóltin væl inn fyri, har Jan E. stóð og smekkaði bóltin í netið til 2-1 til ÍF.
Eitt frálíkt avvrik.
ÍF-liðið tekur yvir.
Álopini hjá ÍF á TB-málið skolaðu inn, og alt bendi á, at ÍF-liðið fór at fáa sín fyrsta sigur, men so bleiv ikki.
Ta einu ferðina TB var í álopi, bríkslaði dómarin fyri brotssparkið til TB, ið ÍF-spælararnir høvdu ilt við at skilja og góðtaka, men har var einki at gera, dømt varð dømt, og TB skroraði sítt næsta mál, so úrslitið gjørdist 2-2.
ÍF trýsti ta løtuna, ið eftir var, men uttan at faa sigursmálið.
Møta KÍ næstu ferð.
Næsti dystur verður móti KÍ í Fuglafirði og spælir ÍF-liðið, sum tað spældi seinna hálvleik í dag móti TB, so verður tað eingin lættur dystur hjá KÍ.
Møtið fjølment, stuðlið okkara liði !
Skriva hevur Signar á Brúnni
