Ein tøkk til stuðlar og hjálparfólk

Nú kappingarárið 2018 er liðugt, vil nevndin í ÍF hervið senda eina stóra tøkk til stuðlar og fólk, ið hava hjálp til á ymiskan hátt,uttan tykkara stuðul og hjálp var ikki møguligt at røkkja teimum málum, sum ÍF hevði sett sær fyri árið 2018.

Dystarfrásøgn ÍF-Giza/Hoyvík

Hvad bagdi ÍF í seinna hálvleiki ?

So vann ÍF á Gisa Hoyvík í Fløtugerði í dag, sum samstundis varð seinasti heimadystur hjá okkara liði í ár.
Hóast ÍF liðið er komið upp í bestu deildina, so hevur liðið stríðst fyri at vinna allar dystirnar, ið eftir eru.
Fyrra hálvleik spældi okkara lið væl, og hevði fult uppiborið sigurin 2-0 í steðginum.
Fyrsta málið skeyt Jann, næsta Ari, ið var eitt vakurt mál.
Stutt eftir at dómarin hevði bríkslað seinna hálvleik í gongd, eydnaðist tað 17 ára gamla Tóri at fáa triðja málið.
Nógv bendi á, at tað fór at gerast ein stórsigur hjá heimaliðnum, men so bleiv ikki.
ÍF liðið hevði eitt skot á tvørstongina, ið ungi evnaríki Tóri skeyt, og nakað seinni rakti Ari stólpan.
Einar fýra ferðir høvdu fuglfirðingar upplagdar málmøguleikar, ið teir lorkaðu burtur – heilt ófatiligt fyri eitt so gott lið.
Nakað inn í seinna hálvleik, tók Gisa Hoyvík yvir, liðið varð nú nógv ágrýtnari enn okkara lið, og tað gav úrslit.
Teimum eydnaðist at fáa tvey mál og okkurt bendi á, at teimum fór at eydnast at fáa javnleik. Teir stríddust og strevaðust, men triðja málið fingu teir ikki.
ÍF liðið vísti lítið og einki í seinna hálvleiki, og mangir vóru áskoðararnir, ið spurdu: Hvat bagir okkara liði ?
Dysturin endaði við 3-2 til fuglfirðingar.
Seinasti dysturin verður á Sandi komandi fríggjadag.
Okkara vón er, at liðið spælir, sum tað spældi fyrra hálvleik í Fløtugerði, so gerst úrslitið gott og ein góður endi í kappingini 2018.

Skriva hevur Signar á Brúnni

Noah Mneney úttikin til landsliðið

Noah er úttikin til U17-landsliðið

Í døgunum 18. til 27. oktober skal U17-landsliðið við dreingjum til innleiðandi EM-undankapping í Makedónia. Umframt Føroyar og vertslandið, vera Ísrael og Spania eisini við í kappingini.

Í summar tók U17-landsliðið lut í Norðurlandameistarakappingini, ið Føroyar vóru vertur fyri. Áki Johansen hevði stutt frammanundan tikið við starvinum sum venjari, og sæð í ljósinum av hesum, er hann væl nøgdur við avrikið hjá dreingjunum, sum endaðu nummar seks av teimum átta luttakandi londunum í NM-kappingini.

Vit ynskja Noah góða eydnu 🙂

 

Eykaaðalfundur

ÍF kallar inn til eykaaðalfund, av tí nevndin ikki bleiv fultmannað til nevndarvalið.

Á skráð: val av fundarstjóra og skrivara og val av nevndarlimið.

Fundurin verður 15 okt kl 20.00 í hølum felagsins.

U15 dreingirnir hava vunnið sín bólk

Hóast ein dystur eftir av kappingini, so er longu greitt, at U15 dreingirnir hava vunnið sín bólk. Talan er um B-bólkin.

Í fyrri helvt kappaðist ÍF við B68 og AB um uppflyting til A-bólkin, har B68 dróg longsta stráið, men AB tapti uppflytingardystin ímóti HB b.

Síðani B-bólkurin byrjaði aftur 2. juni, so hevur ÍF verið flúgvandi, hóast fleiri av dystunum hava verið sera spennandi.

Mikukvøldið møtti ÍF Skála á Skála í einum útsettum dysti. Tá 9 minuttir vóru leiktir, tá hevði ÍF skorað fýra ferðir og endaði við at vinna 5-0.

Fyrri dysturin ímóti Skála endaði 2-0 til ÍF, sum skoraði bæði málini síðst í dystinum.

Fyrra dystin ímóti 07 Vestur vann ÍF 4-1. Seinni dysturin varð leiktur í Fløtugerði og gjørdist sera spennandi. Leingi førdi 07 Vestur 2-1, men í yvirtíðini javnaði fyrst miðverjin, Petur Meinhard, til 2-2 og so eydnaðist tað høgra bakki, Klein, at skora avgerandi málið til 3-2.

Dystirnir ímóti AB hava verið sera tættir og havt løgna vend. Fyrra dystin førdi ÍF 3-0, men tapti 3-6 og í seinna dystinum førdi AB 2-0, men mátti lúta 2-4 fyri hartarbeiðandi ÍF liðnum.

ÍF hevur vunnið báðar dystirnar ímóti Suðuroyarliðnum uttan dyst.

Komandi leygardag stendur B71 fyri skotum á Sandi. Fyrra dystin vann ÍF 4-0 í Fløtugerði.

Hesir hava mannað ÍF liðið: Dávid Petersen og Líggjas Heðinsson (málmenn). Ulrich Klein Beltran, Rógvi Matras, Petur Meinhard Lundsbjerg, Bjarti Højbro (liðskipari), Martin Bogason Lamhauge, Jóhann Højbro (U15 landsliðsleikari), Jákup í Lambanum, Aron Kensson, Liam Hjaltason, Jógvan Torkilsson og Rúnar Johnsson (toppskjútti við 16 málum). Frá U13 hava Markus á Lakjuni, Eyðun Beder og Bergtór á Dalbø Gregersen eisini verið við.

Jenny R. Petersen úttikin til U15 landsliðið

Landsliðsvenjari hjá U15-gentunum, Øssur Hansen, hevur úttikið hópin, sum frá 6. til 11. oktober fer at taka lut í Copa Saint Vincent í Barcelona.

Í millum tær 18 ið eru úttiknar til U15 landsliðið er Jenny R. Petersen.

Talan er um kapping, ið er fyri lið úr øllum heiminum.

Vit ynskja henni góða eydnu 🙂

Jóhan Højbro úttikin til U15 landsliðið

Venjarin hjá U15-landsliðnum við dreingjum, Øssur Hansen, hevur úttikið hópin, sum í døgunum 17. til 21. oktober fer til Liktinstein, har tveir venjingardystir eru á skránni.

Millum teir 18 ið eru úttiknir er Jóhan Højbro.

Báðir dystirnir verða í býnum Ruggell, og spælt verður 18. og 20. oktober.

Vit ynskja Jóhan góða eydnu 🙂