Vegurin frá Fugla­fjarðar Ítróttar­felag/FÍ til Ítróttar­felag Fugla­fjarðar/ÍF

Søgu­brot 3 - Petur Simonsen skrivar.

Í Søgu­brotið 2 varð víst á, at navnið “Ítróttar­felag Fugla­fjarðar” longu stendur í gerða­bókini hjá Fugla­fjarðar kommunu í februar 1941. Hetta kemst av, at felagið hevur søkt “um árligan studning til eina fótbólts­plenu”. Og árið eftir er aftur umsókn frá “Ítróttar­felag Fugla­fjarðar”.

Niður­støðan í Søgu­brotið 2 er, at “Ítróttar­felag Fugla­fjarðar” helst er tað navnið, sum hevur verið brúkt í samskifti og manna millum í fyrru helvt av 1940’unum, og ikki “Fugla­fjarðar bólt­felag”, sum er navnið á felagnum, sum varð stovnað 9. februar 1938.

Fugla­fjarðar Ítrótta­felag stovnað

Tann 25. mars 1946 verður “Fugla­fjarðar Ítrótta­felag” stovnað. Elsta gerða­bókin hjá felagnum, eg havi atgongd til, er frá 1955, og fyrsti fundurin er dag­festur 31. august hetta árið. Í frá­greiðingin frá fundinum stendur m.a., at “nevndin fyri Fugla­fjarðar Ítrótta­felag kom saman til fundar. Allir limir møttir.” Síðani minnir Herluf Berthelsen, sum tá var formaður, á “Lóg fyri Fugla­fjarðar Ítrótta­felag”. Øll lógin, sum hevur 10 greinar, verður síðani endur­givin í gerða­bókini. Um hetta er tann uppruna­liga útgávan – tann frá 1946 – ber ikki til at siga, men iva­leyst er hon á leið tann sama.

Vit skulu ikki endur­geva lógina fyri felagið her, men bert taka grein 1 burtur­úr. Grein 1 ljóðar soleiðis: “Felagið eitur Fugla­fjarðar Ítrótta­felag, tað er stovnað 25. mars 1946 og hevur heim­stað í Fugla­firði.” Ivaleyst er tað av máls­ligum orsøkum, at navnið á felagnum er “Fugla­fjarðar Ítrótta­felag” og ikki “Ítrótta­felag Fugla­fjarðar”. Og uttan iva hevur Herluf Berthelsen, sum var mál­kønur lærari, sín lut í hesum. Men stutt­stavað, verður “Fugla­fjarðar Ítrótta­felag” til “FÍ”. Og tað er ikki tað mest sjálv­sagda navnið at siga í dag­ligari talu og enn minni í einari spentari støðu á vøllinum!

Nevndin, sum varð vald, tá Fugla­fjarðar Ítrótta­felag varð stovnað 25. mars 1946, og sum sat til 1958. Esman Jacobsen kom tó í nevndina fyri Martin Johannesen.
Fv.: Magretha Johannesen (einkjan eftir Martin), Sofus Eliasen, Poul J Hansen, Obert Eliasen og Herluf Berthelsen, sum var formaður øll árini.
Myndin er tikin á 40-ára veitsluni hjá felagnum, sum var í Ítróttar­høllini á Kambsdali 25. mars 1986.
Myndin er lænt úr mynda­savni, sum Signar á Brúnni hevur savnað.

ÍF og Ítróttar­felag Fugla­fjarðar

Í gerða­bókini frá 1955 til 1958, verður hvørja ferð skrivað: “.. kom nevndin fyri Fugla­fjarðar Ítrótta­felag saman til fundar”. Men tá tað í gerða­bókini tann 15. desember 1957 verður greitt frá eini “.. innbjóðing frá Gomlum bólt­spælarum í Fugla­firði til fótbólts­kapping um silvur­steyp millum fótbólts­liðini í Leirvík, Gøtu, Eiði og Fugla­firði”, verður “Fugla­fjarðar Ítrótta­felag” í kappingar­yvirlitinum stutt­stavað sum “Í.F.”

Gerðabókin 1955, síða 1. Lóg fyri Fuglafjarðar Ítróttafelag, sum varð stovnað 25. mars 1946.

Í august 1958 kemur inn­bjóðing frá keyp­monnum í Nes sókn um eina ferða­steypa­kapping millum hondbólts­liðini (kvinnur) í Stranda Ítróttar­felag, Tjaldrinum og “Ítróttar­felag Fugla­fjarðar”. Og í yvir­litinum hjá Ítrótta­sambandi Føroya í 1948 yvir ítrótta­feløg verður felagið úr Fugla­firði nevnt “Ítrótta­felag Fugla­fjarðar”. Hesi dømi vísa, at sjálvt um formliga navnið er “Fugla­fjarðar Ítrótta­felag”, so verður “ÍF” ella “Ítrótta­felag Fugla­fjarðar” brúkt í sambandi við kappingar og av feløgum og felags­skapum hesi árini. Teir, sum skriva undir hesi árini, eru: Herluf Bertelsen, for­maður, Obert Eliasen, Poul Jacob Hansen og Sofus Eliasen, allir stovnarar av felagnum, og so Esman Jacobsen. – Martin Johannesen var í nevndini, sum varð vald í 1946. Men hann var sjó­maður og ivaleyst so nógv burtur, at Esman Jacobsen er komin í hansara stað.

Yvirlit yvir feløg í Ítróttasambandi Føroya í 1948. Her er felagið nevnt “Ítróttafelag Fuglafjarðar”.

Í frágreiðingini frá nevndar­fundi tann 14. mars 1959 stendur skrivað í gerða­bókini “nevnd ÍF’s”. – Hetta er helst fyrstu ferð í gerða­bókini, at “ÍF” verður knýtt at sjálvari nevndini í felagnum. Har stendur: “Við­tikið varð at senda bræv til Fugla­fjarðar sóknar­stýri við áheitan um fund millum nevnd ÍF’s og sóknar­stýrið við­víkjandi serstakari “stadion­nevnd”. Nú eru tað Petur S Rasmussen, for­maður, Judith Róin, Eilif Samuelsen, Ásvør Thomsen og Arnold Abrahamsen, sum skriva undir gerða­bókina. Í frá­greiðingunum í gerða­bókunum næstu árini verður felagið nærum bara nevnt “ÍF” ella “Ítróttar­felag Fugla­fjarðar”. – Onkra einstaka ferð verður kortini skrivað “Fugla­fjarðar Ítrótta­felag”.

ÍF-flaggið frá 1959. Onkuntíð nevnt “Dýnan”.

Onki er at ivast í, at snøgga navnið “ÍF” er munandi betri væl­egnað á leik­vøllinum og í dag­ligari talu enn “FÍ”. Og iva­leyst er tað eisini stutt­stavingin “ÍF”, sum ger, at felagið við tíðini fær navnið “Ítróttar­felag Fugla­fjarðar” – eisini áðrenn nøkur formlig broyting er gjørd í lógunum fyri felagið. Hesi bæði – “Ítróttar­felag Fugla­fjarðar” og “ÍF”, hvørt um annað – er tað, sum frá 50’unum oftast varð brúkt í dagligari talu millum fólk, í skrivligum samskifti, í roknskapum, í kappingum, á búnum, sum bú­merki, á fløggum, í miðlunum v.m. Og soleiðis minnast vit, sum vóru virkin í felagnum í 50’unum og seinni, tað eisini.

Kann til stuttleika leggja aftrat, at rokn­skapurin fyri felagið í 1981 hevur heitið “Ítróttar­felag Fugla­fjarðar”, meðan rokn­skapurin fyri inn­rættanina av kjallaranum í Ítróttar­húsinum sama árið hevur heitið “Fugla­fjarðar Ítróttar­felag”!

Viðtøku­broyting í 1989

Sum nevnt, so er navnið á felagnum “Fugla­fjarðar Ítrótta­felag". Men í “Lógir fyri Fugla­fjarðar Ítróttar­felag”, sum eru endur­skoðaðar í 1976, er “ÍF” skoytt uppí navnið. Men í oktober 1989 verða ymsar broytingar gjørdar í lógunum fyri felagið. Tá verður eisini endaliga staðfest, at formliga navnið er “Ítróttar­felag Fugla­fjarðar”, stutt­stavað “ÍF”.

Samanum­tikið kann sigast, at vegurin hevur bæði verið drúgvur og krókutur til felagið formliga kundi kalla seg “Ítróttar­felag Fugla­fjarðar” – knapt 50 ár! Men “drúgt er tað, ið drýpur” verður jú sagt!

Og munnu ikki flestu fugl­firðingar bara yppa øksl at hesum “nørdarínum” um navnið á felagnum og siga: “Ja, men, soleiðis hevur felagið jú altíð itið í mínari verð – Ítróttar­felag Fugla­fjarðar og ÍF!”